![](https://blogger.googleusercontent.com/img/b/R29vZ2xl/AVvXsEiIvro3mx6xl9VAq3bNVpciPpGrQ0ZKPiE9Slw1MIpL-FYGmhyphenhyphenaGee_suzUJyixqphAHwd7eu6qvzWpl7H52aHphJ_SyTWKQOF2ZrJiqbIpeOxo41hJVjJiYEoiAU6n6hvbjpTQ/s400/Profesions.jpg)
![](https://blogger.googleusercontent.com/img/b/R29vZ2xl/AVvXsEgDqfp_o19Q5PB-meQFgN00XwWiycfwa29tiHEZsp7mNGKG8eD-Odf_K5C4XJWJhpvdJLi-c2dexn5ZQW8Kr81j2nTWLt9G8dns0aE9khRo7UeivKqHM-x3IO3P_GpvwtuPZTQv/s400/Linguas+de+programacion.jpg)
![](https://blogger.googleusercontent.com/img/b/R29vZ2xl/AVvXsEhrEuTEGFoiQj_c9PZdBRT-Cgr8Ve2a_xnMjRfKLcpfWKXTpzjFeJYsNXcpNVF4Tmx3RuGic206GsX3NwU-0IsIA_6VuLNGdWbxw3kwno53pE1N3arAtN0GWZhNoJyYhsSDuA47/s400/Madrid_Barcelona.jpg)
Se hai unha web coa que convén remexer e argallar de cando en cando é http://salarios.infojobs.net/. Entre as tendencias curiosas da crise que percebín alí está a homoxeneización de salarios. Isto que nun principio podería semellar un sintoma de igualdade agocha unha ausencia de diferenciación de CVs no mercado laboral e unha esixencia de mobilidade total para acceder a calquera emprego. Os deliñantes deveñen improvisados informáticos de mantemento, os dependentes de tenda tanto fan de encargados como de mozos de carga e limpadores (por iso en Día nunca se pode pagar cun de 50€ a partir no serán!!!), aos contables pídeselles que sexan fiscalistas e laboralistas, os enxeñeiros xa non son simples calculistas senón comerciais, consultores e burocratas, as secretarias preparan todo tipo de documentos en todo tipo de linguas, eventos e viaxes, as queixas dos clientes pasan por call-centers onde o mesmo (de mal) se atende unha avaría que unha baixa dun contrato e así a marca vai substituíndo aos poucos ao nome do profesional (conversa verídica cun banco on-line:
- Con quen teño o pracer de falar?
- non estou autorizado a dicirllo, señor).
Tocar ocasionalmente de todo un pouco pode resultar divertido e instructivo mas, se o eido de traballo se vai estendendo, os perfís pretendidamente xeralistas rematarán sendo simplemente unha masa anónima e uniforme de empregados que vai levando as tarefas como pode no canto daqueles expertos que oferecen unha solución persoalizada e case artesanal.